一期一會「夜啡」｜旺角咖啡選物館分享會回顧（2026/3/21）

旺角一個晚上，一班咖啡愛好者為同一件事走在一起：用咖啡，認真過一個「夜啡」時光。

今次喺旺角咖啡選物館舉行嘅夜啡分享會，好感謝每一位入嚟坐低嘆杯咖啡嘅朋友，亦都多謝雲粉帶豆、帶手藝一齊玩，令成個活動好有火花。

以玻利維亞 Geisha 咖啡豆 打開夜啡序幕 今次夜啡由一支比賽向、本地烘焙嘅玻利維亞 Geisha 開場（特別鳴謝波比贊助）。

杯中有明亮嘅橙感同花香，口感輕盈乾淨，好適合用嚟 warming up 味蕾，慢慢進入今晚嘅咖啡旅程。

Lab 批次「天堂 Geisha」：1 bar 處理法帶出火龍果果香

第二杯登場嘅係 Lab 批次「天堂 Geisha」，採用 1 bar 新處理法。

入口果香非常奔放，火龍果風味特別搶眼，層次鮮明，係今次夜啡入面討論度最高嘅一杯。 泰國日曬豆：配搭食物的平衡角色

當大家開始食嘢、聊天，我哋就安排咗一支泰國日曬豆登場。

泰國日曬嘅甜感同厚度，令咖啡可以更好配搭小食同點心，為之後幾杯風格各異嘅咖啡做好過渡。 愛樂壓的肯亞水洗

之後到 w 兄出場，用愛樂壓（AeroPress）沖煮肯亞水洗咖啡。

肯亞水洗一向以明亮酸質同果香見稱，配合愛樂壓沖法，呈現出乾淨、集中又有層次嘅風味，亦俾大家體驗到唔同萃取器材帶嚟嘅變化。

「鶯」：在奶茶感與提子香之間搵平衡

接住落嚟係 Mr. Mak 贊助嘅「鶯」，由雲主親自手沖。

一開始，大家都感受到類似泰式奶茶般嘅厚感同香氣。其後雲主試住透過少量加水微調濃度，結果奶茶感收斂之後，提子果香反而更加突出。

點樣喺濃度同風味之間搵平衡，一直都係手沖咖啡師每日面對嘅小小挑戰，而今晚大家都親身見證咗呢種「微調的樂趣」。 特別處理法感受風味：米蘭莊園

今晚嘅朋友仔接受程度都好大 我哋加插咗一支米蘭莊園。 佢超強嘅香蕉香氣好易入口，又有足夠甜感，結果朋友都好受落，現場多幾分歡樂氣氛。 以日武五彩豆作結：老派日式的回甘

徇眾要求之下，最後再上日武五彩豆作為收尾。以日式中心慢水沖法，大粉量配合中深注水，做出帶有深烘回甘感覺嘅風味。 有啡友話，好似去咗日本一間老咖啡店，坐喺木枱前慢慢飲一杯的感覺，呢個回響都令我自己好滿足。

每一杯都是一次相遇

由玻利維亞 Geisha 嘅清新花香、天堂 Geisha 嘅火龍果果感，到泰國日曬嘅甜厚、肯亞水洗嘅酸質與乾淨感，再到「鶯」嘅奶茶感與提子香、米蘭莊園嘅香蕉調性，以至最後日武五彩豆嘅日式深烘回甘，今次夜啡用幾杯咖啡，帶大家行咗一轉好立體嘅風味旅程。

多謝大家用一晚時間，嚟同我哋分享呢一期一會。如果今次你飲到特別鍾意嘅一杯，或者對某支豆有興趣，歡迎之後嚟舖頭再慢慢傾，亦都期待下次夜啡再見到你。 如果大家都想參加我們的夜啡活動, 可留意我們 instagram 公佈